Vidaregåande opplæring
Lærar: Bente Stausland Skartveit
Stavanger katedralskole, Stavanger
Lengd: 13.25 min
Gå til Vimeo for å laste ned filmen

Det er ei utfordring at mange elevar med bokmål som opplæringsmål møter lite nynorsk

i skulekvardagen. Ei løysing på denne utfordringa er å ha nynorske lærebøker i andre fag enn norsk. Dette er ein måte å driva sidemålsundervisning på som dei siste åra har vore prøvd mange stader i landet, både på ungdomssteget og i vidaregåande opplæring.

Nynorsksenteret har aktivt støtta fleire slike lærebokprosjekt, mellom anna prosjektet ved Stavangar katedralskole som vert synt fram som hovuddøme i denne filmen. Dette skuleåret (2012/2013) har til saman fire klassar ved skulen lærebøker på nynorsk i samfunnsfag. I filmen følgjer me to økter i samfunnsfag og får sjå at elevane nyttar læreboka på ein systematisk måte gjennom variert bruk av lese- og skrivestrategiar.

Faglæraren legg særleg vekt på strategiar for å lære og forstå faglege omgrep i samfunnsfag og framhevar at det kan vera ein styrke å læra omgrep både på nynorsk og bokmål. Dette vert også understreka av førstelelektor i norsk ved Høgskolen i Østfold, Benthe Kolberg Jansson, som har fagkommentarane i filmen.
Det er fleire viktige mål knytt til å bruke nynorsk lærebok i eit anna fag enn norsk:

• elevane skal oppleva nynorsk som bruksspråk og fagspråk i eit anna fag enn norskfaget
• å synleggjera for elevane at arbeid med lesing og skriving som grunnleggjande ferdigheiter kan dreia seg om å lesa og skriva tekstar både på nynorsk og bokmål
• å visa kva læringspotensial som ligg i mengdetrening der elevane les og skriv nynorske tekstar i fleire fag

 

Metoden med å bruka lærebøker på nynorsk i andre fag enn norsk er på mange måtar eit «lavterskeltilbod» som er enkelt å gjennomføra, og som ikkje føreset at læraren har spisskompetanse i nynorsk. Forutan Stavanger katedralskole har Nynorsksenteret sidan 2009 støtta liknande prosjekt ved Brandbu ungdomsskole på Gran, Lista ungdomsskole i Farsund, Kolvikbakken ungdomsskole i Ålesund og ved Bardufoss Høgtun videregående skole i Målselv.

Det er forska lite på effekten av å lesa både nynorsk og bokmål. På midten av 1990-talet blei det gjennomført eit større forskingsprosjekt om bruken av fellesspråklege lærebøker i samfunnsfag i den vidaregåande skulen. Konklusjonen var at ordninga ikkje skapte større problem for leseforståinga og læringsutbytet hjå fleirtalet av elevane. Eit tydeleg trekk var at elevane undervurderte ferdigheitene sine i å lesa tekstar på nynorsk og overvurderte seg sjølv når det gjaldt å lesa tekstar på bokmål. For elevar med dysleksi kunne tekstar på nynorsk som sidemål gjera lesinga vanskelegare.

 

Spørsmål til diskusjon

1. Kva fordelar kan det gje å ha nynorsk lærebok i andre fag enn norsk?
2. Korleis kan du som lærar leggja til rette for at elevane skal møta meir nynorsk som fagspråk og bruksspråk?
3. I filmen får vi sjå fleire ulike strategiar å arbeida med læreboka på.
   Kva andre strategiar plar du å bruka når elevane arbeider med læreboka?

Ressursar

Nynorskopplæring nr. 15:
Ingrid Slettevoll: Nynorsk som fagspråk. Om prosjektet ved Stavanger katedralskole.

Nynorsk lærebok i KRL
Denne filmen viser ein klasse ved Holmlia skole i Oslo som har nynorsk lærebok i KRL og korleis dette har gitt klassen ein aktiv og positiv spørjekultur.

Kjell Lars Berge: Språknytt 3/4 1999
Artikkel om forsøket med fellesspråklege lærebøker 1995-97.

Å skrive nynorsk hevar språkkompetansen
Artikkel om ei undersøking frå 2012 gjort av professor Mila Vulchananova saman med språklaboratoriet ved NTNU.